Berlin, 19 avqust, ARHD.AZ

Avropanın müdafiə sənayesi şirkətlərinin səhmləri ucuzlaşıb

Avropanın müdafiə sənayesi sahəsində fəaliyyət göstərən şirkətlərinin səhmləri Rusiya-Ukrayna müharibəsi ilə bağlı Vaşinqtonda keçirilən görüşdən sonra ucuzlaşmağa başlayıb.

ARHD.AZ “Tagesschau” xəbər xidmətinə istinadla bildirir ki, buna səbəb həmin görüşdən sonra bir çox investorun müharibənin başa çatacağına dair gözləntilərlə əlaqədar səhm və istiqrazlarını satmaq barədə qərar qəbul etməsidir.

Məlumata görə, Almaniyanın nəhəng silah istehsalçısı “Rheinmetall” DAX indeksində ən çox dəyər itirən şirkət olub. Onun səhmləri 4,2 faiz ucuzlaşıb. MDAX indeksində isə tank ötürücü sistemlər istehsalçısı “Renk” və hərbi texnologiya təchizatçısı “Hensoldt”un hər birinin səhmləri 5 faizdən çox ucuzlaşıb. Fransanın “Thales” şirkəti 3, İsveçin SAAB konserni isə 4 faizdən çox dəyər itirib.

Bakı, 18 avqust, ARHD.AZ

Azərbaycan Sərhəd Mühafizəsinin 106-cı ildönümü münasibətilə silsilə tədbirlər keçirilib

Azərbaycan Sərhəd Mühafizəsi 106-cı ildönümünü Dövlət Sərhəd Xidmətinin (DSX) yaradıcısı Ümummilli Lider Heydər Əliyevin və onun siyasi irsinin davamçısı, Prezident, Silahlı Qüvvələrin Müzəffər Ali Baş Komandanı İlham Əliyevin rəhbərliyi altında çətin və şərəfli inkişaf yolu keçərək güclü sərhəd mühafizə infrastrukturuna, peşəkar kadrlara, müasir hərbi arsenala malik, iqlim və relyefindən asılı olmayaraq Vətənimizin quru və su sərhədlərini peşəkar şəkildə qorumağa qadir bir qurum kimi qarşılayır.

DSX-nin mətbuat mərkəzindən ARHD.AZ-a verilən məlumata görə, bu münasibətlə DSX-nin struktur qurumlarında və hərbi hissələrində silsilə tədbirlər keçirilib.

“Sərhədçi” Mədəniyyət Mərkəzində Dövlət Himninin səsləndirilməsi ilə başlayan tədbirdə DSX-nin rəisi general-polkovnik Elçin Quliyev çıxış edərək Azərbaycanın Sərhəd Mühafizəsinin 106-cı ildönümü münasibətilə şəxsi heyəti təbrik edib.

Prezident İlham Əliyevin 2025-ci il 16 avqust tarixli sərəncamları şəxsi heyətə elan olunub, zabitlərə ali hərbi rütbələr təqdim edilib, xidməti-döyüş fəaliyyətində fərqlənən hərbi qulluqçular orden və medallarla təltifləndiriliblər.

Tədbirin rəsmi hissəsindən sonra şəxsi heyət Azərbaycan Sərhəd Mühafizəsinin xidməti-döyüş fəaliyyətini özündə tərənnüm edən “Sərhədin 106 ili” filmi nümayiş olunub.

Bakı, 4 avqust, ARHD.AZ

Azərbaycan və Pakistan hərbi dənizçilərinin birgə təlimlərinin keçirilməsi müzakirə olunub

Azərbaycanın müdafiə nazirinin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev ölkəmizdə səfərdə olan Pakistanın Hərbi Dəniz Qüvvələri (HDQ) komandanı admiral Navid Əşrəf və onun rəhbərlik etdiyi nümayəndə heyətini qəbul edib.

Müdafiə Nazirliyinin Mətbuat və ictimaiyyətlə əlaqələr idarəsindən ARHD.AZ-a verilən məlumata görə, görüşdən əvvəl qonaqlar Şəhidlər xiyabanında ölkəmizin müstəqilliyi və ərazi bütövlüyü uğrunda şəhid olmuş vətəndaşlarımızın məzarlarını ziyarət edərək gül dəstələri düzüb, “Əbədi məşəl” abidəsinin önünə əklil qoyublar.

Sonra Azərbaycan Ordusunun Baş Qərargahında görüş keçirilib. General-polkovnik K. Vəliyev qonaqları salamlayaraq onları ölkəmizdə görməkdən məmnun olduğunu bildirib. Ölkələrimiz arasında əlaqələrin qədim tarixi köklərə söykəndiyini qeyd edən Baş Qərargah rəisi hərbi əməkdaşlığımızın yüksək inkişaf mərhələsində olduğunu vurğulayıb.

Admiral N.Əşrəf isə öz növbəsində səmimi qəbula və göstərilən qonaqpərvərliyə görə minnətdarlığını bildirib, qarşılıqlı görüşlərin ikitərəfli hərbi əməkdaşlığa müsbət töhfələr verəcəyindən əminliyini ifadə edib.

Görüşdə Azərbaycan və Pakistan hərbi dənizçilərinin peşəkarlığının daha da artırılması məqsədilə birgə təlimlərin keçirilməsinin əhəmiyyəti xüsusi qeyd olunub, həmçinin qarşılıqlı maraq doğuran bir sıra digər məsələlər ətrafında geniş və səmərəli fikir mübadiləsi aparılıb.

Bakı, 28 iyul, ARHD.AZ

DSX-nin hərbi hissəsində dini radikalizmin fəsadları mövzusunda tədbir keçirilib

Dövlət Sərhəd Xidmətinin (DSX) Göytəpə şəhərində yerləşən hərbi hissəsində Dini Qurumlarla İş üzrə Dövlət Komitəsi (DQİDK) ilə birgə “Dini radikalizmin fəsadları və ona qarşı mübarizə” mövzusunda maarifləndirici tədbir keçirilib.

DSX-nin mətbuat mərkəzindən ARHD.AZ-a verilən məlumata görə, xidmətin şəxsi heyəti, DQİDK-nin nümayəndəsi və din xadiminin iştirakı ilə təşkil olunan tədbirdə əvvəlcə Dövlət Himni səsləndirilib, Ulu Öndər Heydər Əliyevin və ərazi bütövlüyümüz uğrunda canlarını fəda etmiş şəhidlərimizin əziz xatirəsi bir dəqiqəlik sükutla yad edilib.

Daha sonra tədbirin keçirilməsinin əsas məqsədi barədə danışılıb, şəxsi heyətə dini radikalizmin mahiyyəti izah olunub, onun milli təhlükəsizliyə və ictimai sabitliyə törətdiyi təhlükələr diqqətə çatdırılıb, eləcə də, gənc hərbi qulluqçular arasında radikal təsirlərə qarşı maarifləndirmə işlərinin gücləndirilməsinin vacibliyi vurğulanıb.

Çıxış edənlər vətənpərvərliyin, milli-mənəvi dəyərlərə sədaqətin, xalqa, dövlətə və Müzəffər Ali Baş Komandana bağlılıq prinsiplərinin DSX-də əsas prioritet olduğunu bildiriblər.

DQİDK-nin nümayəndəsi çıxış edərək dini radikalizmin yaranma səbəbləri, xarici təsirlər və bu meyillərə qarşı aparılan dövlət siyasəti barədə geniş məlumat verib. Qeyd olunub ki, Azərbaycan dünyəvi və tolerant dəyərləri ilə tanınan bir dövlətdir və ölkəmizdə din dövlətdən ayrı olsa da, dinə, dini dəyərlərə yüksək hörmət göstərilir. Lakin bəzi xarici dairələr bu həssas sahədən sui-istifadə edərək radikal düşüncələri yaymağa çalışır və xüsusilə gəncləri hədəf seçirlər. Radikal ideologiyaların yayılması yalnız dini deyil, həm də ictimai sabitliyi pozmağa yönəlmiş təhlükəli tendensiyalardır, onlara qarşı həm hüquqi, həm də mənəvi mübarizə vacibdir.

Yerli din xadimi dini radikalizmin İslam dini ilə heç bir əlaqəsinin olmadığını vurğulayıb, əsl İslamın dinc, ədalətli və mərhəmətli bir din olmaqla, zorakılığı, nifrəti və cəmiyyətə qarşı çıxmağı qəti şəkildə rədd etdiyini diqqətə çatdırıb. İlahiyyatçı, eyni zamanda, gəncləri düzgün dini biliklərə yiyələnməyə, etibarlı mənbələrdən məlumat almağa və dini fanatizmə qarşı ayıq-sayıq olmağa çağırıb.

Tədbirin sonunda mövzu ətrafında fikir mübadiləsi aparılıb, şəxsi heyəti maraqlandıran suallar cavablandırılıb.

İstanbul, 23 iyul, ARHD.AZ

IDEF 2025-də Türkiyə istehsalı qabaqcıl müdafiə sənayesi məhsulları nümayiş etdirilir

İstanbulda keçirilən 17-ci Beynəlxalq Müdafiə Sənayesi Sərgisində (IDEF 2025) uzaqmənzilli hipersəs ballistik raketdən ilk milli hücum kateri modelinə qədər, Türkiyə istehsalı bir çox qabaqcıl müdafiə sənayesi məhsulu ilk dəfə nümayiş olunur.

ARHD.AZ xəbər verir ki, raket, raket başlıqları və sursat texnologiyaları sahəsində Türkiyənin qabaqcıl şirkəti olan “ROKETSAN”ın “IDEF 2025”də təqdim etdiyi altı yeni məhsul ən çox maraq doğuranlar arasında yer alır. Bunların arasında “TAYFUN BLOK-4” hipersəs ballistik raketi böyük maraqla qarşılanıb. Raket 10 metr uzunluğa və 7200 kiloqram kütləyə malikdir.

“ROKETSAN”, həmçinin “ATMACA” raket mühərriki, “GÖKBORA” hava-hava tipli raketi, “EREN” orta mənzilli zondlama raketi, “300 ER” ballistik raket sistemi, eləcə də “Şimşek-2” peyk buraxılış qurğusunu nümayiş etdirir.

IDEF-də diqqət çəkən digər Türkiyə şirkəti “ASELSAN”dır. Şirkət hədəfi yüksək dəqiqlikli təsvirlə aşkarlayıb kateqoriyalaşdırmaq imkanına malik “CENK 350-N” dəniz platformaları üçün radar sistemini təqdim edir. “ASELSAN” eyni zamanda Türkiyənin yeni müdafiə sistemləri arasında yer alan “GÖKSUR VLS Dikey Atım” hava hücumundan müdafiə sistemi, “DERİNGÖZ 100L/300” avtonom sualtı aparatı, “IDENTIFFY SSR 850” identifikasiya sistemini də IDEF-də sərgiləyir.

Türkiyə şirkətlərinin birinci dəfə təqdim etdiyi məhsullar arasında ilk milli hücum kateri də var. Döyüş missiyalarında gözləmə və gizlənmə qabiliyyətinə malik bu kater düşmənin onu aşkarlamasını və tanımasını çətinləşdirir.

Kater, həmçinin məsafədən idarəolunan raketlərlə hücum etmə, ehtiyac olduqda freqat və helikopterlərlə birgə koordinasiyalı hücum həyata keçirmə imkanına malikdir.

Quru texnikası sahəsində məhsullar təqdim edən “BMC” şirkəti də sərgidə, “Zeybek Vasitə Ailəsi” (zirehli tank daşıyıcı, xilasetmə maşını və 5 tonluq taktiki təkərli vasitə), “TURAN” zirehli yük və personal daşıyıcısı və “ALTUĞ 8x8” 105 millimetrlik qülləli döyüş maşını olmaqla 3 yeni hərbi nəqliyyat vasitəsini ilk dəfə nümayiş etdirir. Bundan əlavə, “BMC Power” tərəfindən istehsal olunan 2 yerli mühərrik də şirkətin stendində yer alır.

Türkiyənin müdafiə texnologiyaları sahəsində qabaqcıl şirkətlərindən olan “HAVELSAN”da sərgidə çoxsahəli komanda-nəzarət vasitələri, süni intellekt dəstəyi ilə qərarvermə xüsusiyyətinə malik sistemlər, pilotlu və pilotsuz texnika və hibrid əməliyyat modelləri kimi çoxsaylı məhsul və xidmətlərini nümayiş etdirir.

Bakı, 23 iyul, ARHD.AZ

İstanbulda Azərbaycan-Pakistan hərbi əməkdaşlığının yeni perspektivləri müzakirə edilib

“IDEF 2025” 17-ci Beynəlxalq Müdafiə Sənayesi Sərgisində iştirak etmək üçün Türkiyədə səfərdə olan Azərbaycanın müdafiə naziri general-polkovnik Zakir Həsənov Pakistanın Birləşmiş Qərargah Rəisləri Komitəsinin sədri general Sahir Şamşad Mirza ilə görüşüb.

Bu barədə ARHD.AZ-a Müdafiə Nazirliyinin Mətbuat və ictimaiyyətlə əlaqələr idarəsindən məlumat verilib.

Bildirilib ki, İstanbul şəhərində keçirilən görüşdə ölkələrimiz arasında əlaqələrin qarşılıqlı inama, əməkdaşlığa, eləcə də mədəni əsaslara söykəndiyi vurğulanıb. Tərəflər Azərbaycan-Pakistan hərbi əməkdaşlığının cari vəziyyətini müzakirə edib, bu münasibətlərin daha da möhkəmləndirilməsi istiqamətində həyata keçiriləcək tədbirlər barəsində ətraflı fikir mübadiləsi aparıblar.

Görüşdə, həmçinin hərbi əlaqələrimizin yeni inkişaf perspektivləri müzakirə olunub.

Bakı, 21 iyul, ARHD.AZ

ANAMA: Ötən həftə 79 mina və 178 partlamamış hərbi sursat zərərsizləşdirilib

Azərbaycan Respublikasının Minatəmizləmə Agentliyi (ANAMA) işğaldan azad edilmiş ərazilərdə minatəmizləmə fəaliyyətinə cəlb olunmuş qurumlar tərəfindən 14-20 iyul tarixlərində icra edilən minatəmizləmə əməliyyatlarına dair məlumatı açıqlayıb.

ANAMA-dan ARHD.AZ-a bildirilib ki, ötən həftə Tərtər, Ağdərə, Kəlbəcər, Ağdam, Xocalı, Xankəndi, Xocavənd, Laçın, Şuşa, Füzuli, Qubadlı, Cəbrayıl və Zəngilanda aparılmış minatəmizləmə əməliyyatları zamanı piyadaəleyhinə 73, tankəleyhinə 6 mina və 178 partlamamış hərbi sursat aşkarlanaraq zərərsizləşdirilib.

Həmçinin həftə ərzində 1 641 hektar ərazi mina və partlamamış hərbi sursatdan təmizlənib.

Bakı, 15 iyul, ARHD.AZ

Mərakeş qabaqcıl zirehli texnika istehsal etməyə hazırlaşır

Mərakeşdə “WhAP 8x8” qabaqcıl yerüstü döyüş zirehli maşınlarının yerli istehsalına yönəlmiş irimiqyaslı hərbi-sənaye layihəsinin başlanması üçün praktiki hazırlıqlara başlanılıb.

ARHD.AZ Mərakeşin “Akhbarona” internet qəzetinə istinadla xəbər verir ki, layihə Berrəşid bələdiyyəsində “TATA Advanced Systems Maroc (TASM)” adı altında yaradılacaq sənaye obyektinin ərazisində həyata keçiriləcək.

İddialı hərbi layihə çərçivəsində cəmi 400 ədəd “WhAP 8x8” zirehli maşın istehsal olunacaq, onlardan 150-si bir neçə döyüş konfiqurasiyası və rolunda Mərakeş Kral Silahlı Qüvvələrinə veriləcək.

Zavod işə salındıqda istehsalın inteqrasiya səviyyəsi 35 faiz təşkil edəcək və tədricən 50 faizə yüksələcək. Tikinti işlərinin maksimum 36 ay ərzində başa çatdırılması nəzərdə tutulur. Zavod ildə 100 zirehli maşın istehsal edə biləcək, burada 90-a yaxın daimi və 250 dolayı iş yeri yaradılacaq. “Akhbarona” yazır ki, bu addımı milli hərbi istehsal sektorunda keyfiyyət sıçrayışı adlandırmaq olar.

Layihə Mərakeş üçün müdafiə sənayesində yeni strateji üfüqlər açır, həmçinin gələcək çağırışlarla üzləşmək üçün texnoloji və hərbi müstəqilliyə arxalanan regional aktor kimi ölkənin mövqeyini gücləndirir.