ABŞ ilə davamlı sülhün əldə olunması məqsədilə keçiriləcək danışıqlarda iştirak edəcək İran nümayəndə heyəti İsveçrəyə gəlib.
“ARHD.MEDiA” xəbər verir ki, İsveçrə Xarici İşlər Nazirliyi İran nümayəndə heyətinin ölkəyə gəlişini təsdiqləyərək, onları rəsmi şəkildə qarşıladıqlarını bildirib.
Məlumata görə, danışıqlar İsveçrənin Bürgenştok şəhərində keçiriləcək.
İran mediası da səfəri təsdiqləyib və nümayəndə heyətinə İran parlamentinin sədri Məhəmməd Baqer Qalibafın rəhbərlik edəcəyi gözlənildiyini açıqlayıb.
Danışıqlarda ABŞ ilə İran arasında davamlı sülh, nüvə proqramı, regional təhlükəsizlik və digər mühüm məsələlərin müzakirəsi nəzərdə tutulur.
Qalibaf “X” sosial şəbəkə hesabında Minab şəhərindəki hadisələr və şəhidlərin xatirəsinə dair emosional paylaşım edib. O yazıb ki, Minabın məzlum övladlarını və İranın bütün şəhidlərini hər zaman öz hərəkətlərinin “müşahidəçisi” kimi görür: “Mən Minabın məzlum övladlarını və əziz İranın bütün şəhidlərini hər zaman hərəkətlərimin və davranışlarımın müşahidəçisi hesab edirəm. Onlar bizi görür və gözləyirlər. Allah məni məzlum şəhidlərdən və İran millətindən utandırmasın”.
O, paylaşımını “#Minab168” həştəqi ilə Minab məktəbi uşaqlarının xatirəsinə həsr edib.
