WUF13 Şəhərsalma Sərgisi Forum tarixinin ən böyük sərgisi olacaq

Bakıda keçiriləcək Ümumdünya Şəhərsalma Forumunun 13-cü sessiyası – WUF13 çərçivəsində təşkil ediləcək Şəhərsalma Sərgisi (Urban Expo) həm əhatə dairəsi, həm də iştirakçı təşkilatların sayına görə forum tarixinin ən böyük sərgisi olacaq.

“ARHD.MEDiA” AZƏRTAC-a istinadən xəbər verir ki, WUF13 Şəhərsalma Sərgisində dünyanın 66 ölkəsindən 163-dən çox təşkilat iştirak edəcək.

Forumda özəl sektorun iştirakı da rekord səviyyədə olacaq. Belə ki, WUF13-də ümumilikdə 45 şirkət təmsil olunacaq, onların 14-ü isə startapdır. Tədbir çərçivəsində startaplar və innovativ təşəbbüslər üçün xüsusi platforma – Biznes və İnnovasiya Habı (Mərkəzi) ilk dəfə iştirakçıların istifadəsinə veriləcək.

WUF13-də dünyanın müxtəlif ölkələrindən 44-dən çox şəhər meri də iştirak üçün qeydiyyatdan keçib. Bu, Forumun qlobal şəhər idarəçiliyi və beynəlxalq əməkdaşlıq baxımından əhəmiyyətini bir daha nümayiş etdirir.

Eyni zamanda, vətəndaş cəmiyyəti institutlarının sessiyadakı iştirakı da yüksək səviyyədə olacaq. Şəhərsalma Sərgisində 42 vətəndaş cəmiyyəti təşkilatı və fond təmsil olunacaq.

Qeyd edək ki, xəbərdə yer alan məlumatlar bu günədək olan informasiyadır. Rəqəmlər dəyişə bilər.

Onu da xatırladaq ki, WUF13 mayın 17-dən 22-dək Bakıda keçiriləcək və tədbir çərçivəsində şəhərlərin gələcəyi, dayanıqlı inkişaf, iqlim çağırışları, rəqəmsal transformasiya və inklüziv urbanizasiya məsələləri müzakirə olunacaq.

Azərbaycan güləşçiləri Avropa çempionatının finalında

Bolqarıstanın Samokov şəhərində güləş üzrə U17 Avropa çempionatına start verilib.

“ARHD.MEDiA” xəbər verir ki, ilk yarış günündə yunan-Roma güləşi üzrə 48, 55, 65, 80 və 110 kq-da finalçılar müəyyənləşib.

Ömər Salmanov (48 kq) türkiyəli Şamil Şahan (8:1), çexiyalı Simon Sritr (8:0) və macarıstanlı Benedek Tombora (9:0) qalib gələrək finala yüksəlib. Həmyerlimiz sabah həlledici görüşdə rusiyalı Artyom Tkaçenkoyla güləşəcək.

Qurban Məcnunov (55 kq) polşalı Yakub Şkripçak (9:0), gürcüstanlı Giorgi Kedelidze (5:3), ukraynalı Raxman Qamidov (11:2) və norveçli Abu Bakar Saqaya (9:0) qalib gələrək adını finala yazdırıb. Güləşçimiz sabah çempionluq uğrunda son qarşılaşmada rusiyalı Edem Payziyevlə mübarizə aparacaq.

Orxan Həbibli (65 kq) bolqarıstanlı Antoan Tsvetanovu (7:1) yarışdan kənarlaşdırsa da, 1/4 finalda rusiyalı Aslan Dzuevə 4:8 hesabıyla uduzub. Rəqib finala yüksəldiyi üçün millimizin üzvü sabah təsəlliverici görüşə çıxacaq. Rəqib Dionisios Bulutidis (Yunanıstan) – Qabriel Lunqu (Rumıniya) qarşılaşmasının qalibi olacaq.

Zəka Yusubov (80 kq) rumıniyalı Robert Kukiureana (8:0) və rusiyalı Yeqor Kuropiatnikova (7:6) qalib gəldikdən sonra 1/4 finalda ukraynalı Danyil Melniçuka minimal fərqlə məğlub olub – 3:4.

Məhəmməd Mustafayev (110 kq) debütdə ukraynalı Maksim Sokolyuka müqavimət göstərə bilməyib – 0:9.

ÇL-də final matçının hakimləri bəlli oldu

UEFA Çempionlar Liqasının final qarşılaşmasının hakim təyinatları açıqlanıb.

“ARHD.MEDiA” xəbər verir ki, PSJ və “Arsenal” komandaları arasında keçiriləcək həlledici oyun Almaniyadan olan hakimlər briqadasına həvalə edilib.

Final matçında baş hakim funksiyasını Daniel Zibert yerinə yetirəcək. Ona VAR (Video Köməkçi Hakim) otağında həmyerlisi Bastian Dankert köməklik göstərəcək.

Qeyd edək ki, Çempionlar Liqasının böyük finalı mayın 30-da Macarıstanın paytaxtı Budapeştdə yerləşən “Puşkaş Arena”da keçiriləcək.

Qazaxıstanda iki cüdoçumuz mübarizəyə başlayır

Qazaxıstanın paytaxtı Astanada cüdo üzrə “Böyük Dəbilqə” turniri davam edir.

“ARHD.MEDiA” xəbər verir ki, Azərbaycanın iki cüdoçusu bu gün mübarizəyə qoşulacaq.

Rəşid Məmmədəliyev (73 kq) 1/8 finalda Yersultan Duysenxan (Qazaxıstan) / Arun Kumar (Hindistan) cütünün qalibi ilə üz-üzə gələcək.

Eyni mərhələdə Südabə Ağayeva (70 kq) isə almaniyalı Miriam Butkereytlə qarşılaşacaq.

Xatırladaq ki, “Böyük Dəbilqə” mayın 10-u başa çatacaq.

“Kikboksinq Federasiyası minlərlə üzvü olan böyük idman təşkilatına çevrilib”

Son illər Azərbaycanda idmanın inkişafı dövlət siyasətinin prioritet istiqamətlərindən birinə çevrilməklə yanaşı, bu sahədə həm infrastruktur, həm də beynəlxalq nəticələr baxımından ciddi irəliləyişlər müşahidə olunur.

Bunu Azərbaycan Kikboksinq Federasiyasının vitse-prezidenti Azər Aslanov deyib.

Onun sözlərinə görə, müstəqillikdən sonra, xüsusilə 2000-ci illərdən etibarən ölkədə idman infrastrukturu geniş şəkildə yenilənib:

“Bakı və regionlarda çoxsaylı olimpiya idman kompleksləri, stadionlar, idman zalları və təlim mərkəzləri inşa olunub. Nəticə etibarilə, bu, ölkədə idmanın inkişafına və gənclərin idmana cəlb olunmasına geniş şərait yaradıb. Bu prosesdən Azərbaycan Kikboksinq Federasiyası da kənarda qalmayıb və ölkədə idmanın kütləviliyinə səmərəli töhfəsini verib”, – deyə o bildirib.

Azər Aslanov kikboksinqə olan marağın hər keçən gün artdığını da vurğulayıb:

“Azərbaycan Kikboksinq Federasiyasının təşkil etdiyi tədbirlər izdihamlı keçir. Bu da kikboksinqə olan marağı artırmaqla yanaşı, idmanın kütləviliyini də təmin edir. Federasiya minlərlə üzvü olan idman təşkilatına çevrilib”.

ARHD.MEDİA

Misli Premyer Liqasında XXX tura start verilir

Misli Premyer Liqasında XXX tura start verilir.

“ARHD.MEDiA” xəbər verir ki, ilk oyun günü iki qarşılaşma keçiriləcək.

Günün ilk oyununda "Kəpəz" "Sumqayıt"ı qəbul edəcək. Yevlax şəhər stadionunda baş tutacaq görüşün start fiti 16:00-da səslənəcək. Matçın baş hakimi Əli Əliyev olacaq.

"Sumqayıt" 38 xalla yeddinci, "Kəpəz" 21 xalla onuncudur.

Günə isə "Araz-Naxçıvan" - "İmişli" matçı ilə yekun vurulacaq. Görüş Sumqayıtdakı "SOCAR Polymer Arena"da baş tutacaq və 18:30-da start götürəcək.

Qeyd edək ki, "Araz-Naxçıvan" 40 xalla altıncı, "İmişli" isə 29 xalla doqquzuncudur.

“Hafka” ilə Qurban Qurbanov bir arada - Foto

Tanınmış iş adamı, “Bakı” FK-nın sabiq rəhbəri Hafiz Məmmədov (Hafka) və “Qarabağ”ın baş məşqçi Qurban Qurbanov idmançı Hacı Əliyevin doğum günündə bir araya gəlib.

“ARHD.MEDiA” xəbər verir ki, onlar məclisdə birgə foto çəkdiriblər.

Qeyd edək ki, H.Məmmədov 2015-ci ildən sonra iş həyatında uğursuzluq yaşamağa başlayıb. Həmin vaxtdan sonra sahib olduğu şirkətləri itirib. Ona məxsus “Baghlan Group” şirkəti”, “Bank of Azerbaijan” iflas edib. Böyük pay sahibinə çevrildiyi “Lans” klubu da əlindən çıxıb. Eyni zamanda “Bakı” klubu da fəaliyyətini dayandırıb. Hətta o, borclar səbəbindən məhkəmə qərarı ilə klubun Biləcəri qəsəbəsindəki böyük bazasını da itirib.

Həmin fotonu təqdim edirik:

Avropa Liqasında həlledici gecə: Yarımfinal həyəcanı başlayır

Bu axşam UEFA Avropa Liqasının yarımfinal mərhələsinin ilk oyunları keçiriləcək.

“ARHD.MEDiA" xəbər verir ki, günün qarşılaşmalarında "Braqa" "Frayburq"u, "Nottingem Forest" isə "Aston Villa"nı qəbul edəcək.

Qeyd edək ki, yarımfinal mərhələsinin cavab oyunları isə mayın 7-də keçiriləcək.

UEFA Avropa Liqası

Yarımfinal mərhələsi

30 aprel

23:00, "Braqa" - "Frayburq";

23:00, "Nottingem Forest" - "Aston Villa".

Azərbaycan “Böyük Dəbilqə”yə 6 cüdoçu ilə gedir

Beynəlxalq Cüdo Federasiyasının təqviminə əsasən, mayın 1-dən 3-dək Tacikistanın paytaxtı Düşənbədə Böyük Dəbilqə turniri keçiriləcək.

“ARHD.MEDiA” xəbər verir ki, Azərbaycan mötəbər yarışda kişilərdən ibarət yığma komandanın böyük məşqçiləri – Elçin İsmayılov və Slavko Tekiçin rəhbərliyi altında 4 çəki dərəcəsində 6 cüdoçu ilə təmsil olunacaq.

Dünya Cüdo Turuna daxil olan turnirdə 34 ölkədən 248 idmançı qüvvəsini sınayacaq.

Kişilər

-60 kq

Murad Muradlı

-66 kq

Nizami İmranov

İslam Rəhimov

-73 kq

Rəşid Məmmədəliyev

+100 kq

Uşanqi Kokauri

Camal Qamzatxanov

İki güləşçimiz çempion oldu - Medalların sayı 13-ə çatdı

Azərbaycan güləşçiləri Albaniyanın paytaxtı Tiranada keçirilən Avropa çempionatını 13 medalla başa vurublar.

“ARHD.MEDiA” xəbər verir ki, yarışın sonuncu günündə sərbəst güləşdə beş çəki dərəcəsində mükafatçılar bəlli olub.

Nurəddin Novruzov (61 kq) üçüncü yer uğrunda görüşdə italiyalı Simone Pirodduya uduzub. Turan Bayramov (74 kq) finalda Taymuraz Salmazanova (Slovakiya), Arseniy Djioyev (86) İbrahim Kadiyevə (UWW) məğlub olaraq gümüş medala sahib çıxıblar.

Ali Tsokayev (92 kq) finalda Ahmed Batayevə (Bolqarıstan), Giorgi Meşvildişvili (125) Vladislav Baytsayevə (Macarıstan) qalib gələrək Avropa çempionu olublar.

Xatırladaq ki, daha əvvəl yunan-Roma güləşçilərindən Həsrət Cəfərov (67 kq) və Qurban Qurbanov (82 kq) Avropa çempionu olublar. Rəşad Məmmədov (55 kq), Nihat Məmmədli (60 kq) və İslam Abbasov (87 kq) isə bürünc medal qazanıblar. Yunan-Roma güləşi üzrə milli komanda hesabında birinci yeri tutub. Qadın güləşçilərdən Jalə Əliyeva (57 kq) və Günay Qurbanova (59 kq) bürünc mükafata sahib çıxıblar. Sərbəst güləşdə İslam Bazarqanov (57 kq) qızıl, Cəbrayıl Hacıyev (79 kq) bürünc medal əldə edib.

İki güləşçimiz çempion oldu, medalların sayı 13-ə çatdı.