Putinin xaricdə Rusiya ordusundan istifadə səlahiyyətləri genişləndirildi

Rusiya Dövlət Duması ölkə prezidentinin silahlı qüvvələrdən ölkə xaricində istifadə səlahiyyətlərini əhəmiyyətli dərəcədə genişləndirən qanunu ikinci və üçüncü oxunuşlarda qəbul edib.

“ARHD.MEDiA” Rusiya mətbuatına istinadən xəbər verir ki, “Vətəndaşlıq haqqında” və “Müdafiə haqqında” federal qanunlara edilən düzəlişlərə əsasən, bundan sonra Prezident Vladimir Putin xaricdə Rusiya vətəndaşlarının həbs edilməsi, saxlanılması, cinayət və digər təqibə məruz qalması hallarında onların müdafiəsi üçün ordunun xidmətlərindən yararlana biləcək.

Məlumata görə, söhbət rusiyalıların xaricdə Rusiyanın iştirakı olmadan səlahiyyətlərə malik olan məhkəmələr, eləcə də Rusiyanın tanımadığı beynəlxalq məhkəmə orqanları tərəfindən həbs edildiyi hallardan gedir.

Qeyd edək ki, qüvvədə olan “Təhlükəsizlik haqqında” federal qanuna əsasən, prezident ölkələrin və ya beynəlxalq orqanların Rusiyanın maraqlarına zidd və ya Rusiyada ictimai hüquq qaydalarının əsaslarına zidd qərarlar qəbul etdiyi hallarda qoşunları xaricə göndərmək hüququna malikdir.

Həyat yoldaşı Makronu iranlı aktrisa ilə yazışmalarına görə şillələyib - KİV

Fransa Prezidenti Emmanuel Makron və həyat yoldaşı Bricit Makron arasında ötən il Vyetnama səfər zamanı baş verən və geniş müzakirələrə səbəb olan “şillə” hadisəsi ilə bağlı yeni iddialar üzə çıxıb.

“ARHD.MEDiA” xəbər verir ki, bu barədə “Daily Mail” məlumat yayıb.

Məlumata görə, fransalı jurnalist Florian Tardifin “Demək olar ki ideal cütlük” adlı yeni kitabında hadisənin arxa planı ilə bağlı diqqətçəkən iddialar irəli sürülüb.

Tardifin sözlərinə görə, Bricit həyat yoldaşının telefonunda iranlı aktrisadan gələn mesajı gördükdən sonra gərginlik yaşanıb.

Jurnalist iddia edib ki, Makronla həmin aktrisa arasında bir neçə ay davam edən “platonik münasibət” olub və Makron ona “sizi çox gözəl hesab edirəm” kimi mesajlar göndərib.

Florian Tardif açıqlamasında bu məlumatları prezidentə yaxın mənbələrdən eşitdiyini bildirərək kitabında yer alan bütün iddiaların faktlara əsaslandığını vurğulayıb.

Xatırladaq ki, hadisə ilk dəfə gündəmə gələndə Emmanuel Makron yayılan görüntülərin böyüdülməməli olduğunu və xanımı ilə zarafatlaşdığını demişdi.

ABŞ şirkətinin nümayəndələri TRIPP üçün Ermənistana səfər ediblər

ABŞ-nin AECOM şirkətinin əməkdaşları “Beynəlxalq Sülh və Rifah naminə Tramp Marşrutu” (TRIPP) layihəsi çərçivəsində ərazini öyrənmək üçün Ermənistana səfər ediblər.

“ARHD.MEDiA” xəbər verir ki, bu barədə Ermənistan hökumətinin Mətbuat xidməti məlumat yayıb.

Ermənistan Baş nazirinin müavini Mqer Qriqoryanla görüşdə şirkət nümayəndələri layihənin texniki-iqtisadi əsaslandırılmasının hazırlanması üzrə işin əsas istiqamətlərini, həmçinin tədqiqatın gözlənilən nəticələrini təqdim ediblər.

Şirkət nümayəndələri ilə söhbət zamanı M.Qriqoryan regionda sülhün və sabitliyin möhkəmləndirilməsi baxımından təşəbbüsün əhəmiyyətini vurğulayıb.

Türkiyə və Ermənistan birbaşa ticarətə hazırlaşır

Ankara və İrəvan iki ölkə arasında birbaşa ticarətin başlanmasına hazırlığı başa çatdırıb.

“ARHD.MEDiA” xəbər verir ki, bu barədə Türkiyə Xarici İşlər Nazirliyinin (XİN) rəsmi nümayəndəsi Öncü Keçeli “X” sosial şəbəkəsindəki hesabında açıqlama verib.

“2022-ci ildən davam edən Ermənistanla münasibətlərin normallaşdırılması prosesi kontekstində qəbul edilmiş etimadın möhkəmləndirilməsi tədbirləri çərçivəsində ölkəmizlə Ermənistan arasında birbaşa ticarətin başlanması üçün bürokratik hazırlıqlar 11 may 2026-cı il tarixinə tamamlanıb”, - diplomat bildirib.

Bununla belə, Keçeli iki ölkə arasında ümumi sərhədin açılması üçün zəruri texniki və bürokratik işlərin davam etdirildiyini diqqətə çatdırıb.

“Həyata keçirilən yeni tənzimləmə sayəsində Türkiyədən üçüncü bir ölkəyə, oradan da Ermənistana gedən və ya eyni marşrutdan istifadə edərək gələn malların son çatma və ya çıxış nöqtəsinin “Ermənistan/Türkiyə” şəklində yazıla bilməsi mümkün hala gətirilmişdir”, - XİN-in sözçüsü əlavə edib.

ÜST-dən hantavirusla bağlı - Xəbərdarlıq

Ümumdünya Səhiyyə Təşkilatının (ÜST) baş direktoru Tedros Adhanom Qebreyesus “MV Hondius” kruiz gəmisində yayılan hantavirusla bağlı ölkələrə xəbərdarlıq edib.

“ARHD.MEDiA”nın xəbərinə görə, o, Madriddə keçirilən mətbuat konfransında bildirib ki, yaxın həftələrdə yeni yoluxma hallarının qeydə alınması mümkündür.

Qebreyesus İspaniyaya çətin vəziyyətdə olan gəmini qəbul etdiyinə görə təşəkkür edib və bunu “şəfqət və həmrəylik nümunəsi” adlandırıb.

ÜST rəhbəri hazırkı vəziyyətin genişmiqyaslı epidemiyaya işarə etmədiyini desə də, virusun uzun inkubasiya dövrünün narahatlıq yaratdığını vurğulayıb: “İnkubasiya müddətinin uzun olması səbəbindən yaxın həftələrdə yeni halların ortaya çıxması mümkündür”.

Tramp Çinə gedir

ABŞ Prezidenti Donald Tramp Çinə rəsmi səfərə yollanıb.

“ARHD.MEDiA” xəbər verir ki, bu, ABŞ Prezidentinin son 9 ildə Çinə ilk səfəri hesab olunur.

Səfər çərçivəsində Trampı Çin Sədri Si Cinpin rəsmi mərasimlə qarşılayacaq. Liderlərin Pekində bir sıra görüşlər keçirəcəyi gözlənilir.

Trampı səfərdə ölkənin iri biznes dairələrinin nümayəndələri də müşayiət edir. Nümayəndə heyətində “Tesla” rəhbəri İlon Mask, “Boeing” rəhbəri Kelli Ortberq və “BlackRock” CEO-su Larri Fink də yer alıb.

ABŞ Dövlət katibi Marko Rubio və müdafiə naziri Pit Heqset də nümayəndə heyətinə daxildir.

Məlumata görə, tərəflər kənd təsərrüfatı məhsullarının idxalı, texnologiya, investisiya və regional təhlükəsizlik məsələlərini müzakirə edəcəklər.

Tramp Ağ Evdən ayrılarkən jurnalistlərə açıqlamasında İran məsələsinin də gündəmdə ola biləcəyini bildirib.

“Paşinyanda siyasi iradə olsa, referenduma gedəcək”

“Azərbaycanda hamı gözləyir ki, Ermənistanda parlament seçkilərindən sonra referendum keçiriləcək. Referendum vasitəsilə konstitusiyada dəyişiklik baş verə bilər. Referenduma isə ən azı üç ay vaxt lazımdır. Düşünmürəm ki, bu dərhal baş verməyəcək”.

“ARHD.MEDiA” xəbər verir ki, bunu “Prezident İlham Əliyevin sülh strategiyası sabitliyin qarantıdır” mövzusunda tədbirdə sabiq xarici işlər naziri Tofiq Zülüqarov bildirib.

“Cənab Prezident xüsusi qeyd etmişdi ki, biz regionda sülhün əsas təşəbbüskarıyıq. Zəngilanda bu fikir öz təsdiqini tapdı. Ermənistan öz ev tapşırığını yerinə yertirməlidir. Paşinyanda siyasi iradə olsa, referenduma gedəcək. Getməsə, sazişin imzalanması gözlənilmir. Azərbaycan öz mövqeyindən çəkilən deyil”.

Moskvadan kənarda görüş üçün şərt irəli sürdü

“Rusiya Prezidenti Vladimir Putin Ukrayna lideri Volodimir Zelenski ilə Moskvadan kənarda yalnız münaqişəyə son nöqtə qoymaq üçün görüşməyə hazırdır”.

“ARHD.MEDiA” Rusiya mətbuatına istinadən xəbər verir ki, bu şərti brifinqdə Kremlin mətbuat katibi Dmitri Peskov açıqlayıb.

Onun sözlərinə görə, bu görüşdən əvvəl hələ böyük ev tapşırığı görülməlidir.

“Prezident Kremldəki mətbuat konfransında çıxışı zamanı da bildirdi ki, danışıqlar üçün istənilən an Moskvada, həmçinin istənilən başqa nöqtədə Zelenski ilə görüşməyə hazırdır. Lakin istənilən başqa nöqtədə görüş yalnız prosesi tam şəkildə yekunlaşdıracağı təqdirdə məna kəsb edir”, - Peskov deyib.

Tramp onları xələfləri adlandırdı

ABŞ Prezidenti Donald Tramp ölkənin hazırkı vitse-prezidenti Ceyms Devid Vens və dövlət katibi Marko Rubioni ideal komanda və 2028-ci il seçkilərində Respublikaçılar Partiyasının potensial namizədləri adlandırıb.

“ARHD.MEDiA” xəbər verir ki, Tramp bu barədə Ağ Evdə keçirilən tədbir zamanı danışıb.

Bununla belə, ABŞ lideri onlardan hansının prezidentliyə, hansının isə vitse-prezident vəzifəsinə namizəd olacağını dəqiqləşdirməyib.

Xatırladaq ki, ABŞ-də növbəti prezident seçkiləri 2028-ci ilin noyabrında keçiriləcək.

Yenə tədbir zamanı mürgülədi - Video

ABŞ Prezidenti Donald Tramp Ağ Evdə keçirilən tədbir zamanı kameralar qarşısında qısa müddət mürgüləyərkən görüntülənib.

“ARHD.MEDiA” xəbər verir ki, Oval ofisdə təşkil olunan proqramda “Medicare və Medicaid” Xidmətləri Mərkəzinin (CMS) direktoru Mehmet Öz, respublikaçı senator Keti Britt və ABŞ Səhiyyə Nazirliyinin rəsmisi Doroti Fink də iştirak edib.

Tədbir çərçivəsində amerikalı qadınları daha çox uşaq sahibi olmağa təşviq etmək məqsədilə hazırlanmış yeni internet platformasının təqdimatı keçirilib. Çıxışlar davam edərkən Trampın gözlərini yumduğu və yorğun göründüyü anlar kameralara əks olunub.

Sosial şəbəkələrdə geniş müzakirələrə səbəb olan görüntülərdən sonra ABŞ mediasında Trampın son dövrlərdə ictimai tədbirlərdə tez-tez yorğun və halsız göründüyü ilə bağlı iddialar yenidən gündəmə gəlib.