“Trampın razılaşması bizi öhdəlik altına salmır. İsrail ABŞ-yə tabe deyil, biz müstəqil və suveren dövlətik”.

“ARHD.MEDiA” xəbər verir ki, bu fikirləri İsrailin milli təhlükəsizlik naziri İtamar Ben-Qvir “X” hesabındakı bəyanatında yazıb.

“İsrail vətəndaşlarına, İsrail Ordusunun əsgərlərinə və yəhudi xalqına qarşı borcumuz, həmçinin minilliklər boyu sürgün və qətliamlara məruz qalmış yəhudilər qarşısındakı tarixi məsuliyyətimiz yəhudilərin təhlükəsizliyini təmin etməkdir.

Hər dəfə İsrailin təhlükəsizliyi hesabına beynəlxalq təzyiqlərə boyun əydikdə, bunun əvəzini ağır şəkildə ödəmişik.

ABŞ-ni sevirik və Prezident Donald Trampa minnətdarıq. Amma eyni zamanda İsrailin öz mənafeyi var.

Mən bunu Baş nazirə (red. Baenyamin Netanyahu) davamlı deyirəm və mühüm tarixi qərar anlarında qapalı görüşlərdə də təkrar edirəm: tarixi anlarda tarixi qərarlar verilməlidir.

Mövqeyim aydındır: təhlükəsizliyimizi təmin etməyən bu razılaşmanın tərəfdarı deyilik və bu razılaşma bizimlə heç bir şəkildə bağlı deyil”.

O qeyd edib ki, İsrail hökuməti “Hizbullah”ın silahsızlaşdırılmasından azına razı ola bilməz:

“Döyüşçülərimizin nəzarətə götürdüyü ərazilərdən geri çəkilməməliyik. Minlərlə silahlının yenidən şimal yaşayış məntəqələrinin sərhədlərinə qayıtdığı vəziyyətə dönməməliyik. Və əlbəttə, İsrailə edilən heç bir atəşə susmamalıyıq.

Livandan İsrailə doğru hər bir dron, PUA və ya raket buraxılışı İsrailin cavab zərbəsi ilə nəticələnəcək”.