“ABŞ Prezidenti Donald Trampın İran İslam İnqilabı Keşikçiləri Korpusu (SEPAH) ilə qeyri-rəsmi əlaqə kanalının olması barədə bəyanatı həqiqəti əks etdirmir və dezinformasiyadır”.

“ARHD.MEDiA” “The Tehran Times” nəşrinə istinadən xəbər verir ki, bu barədə hərbi birliyin rəsmi nümayəndəsi Hüseyn Mohebbi bildirib.

“SEPAH nümayəndələri ilə amerikalılar arasında heç bir dialoq yoxdur. Trampın bu yalan bəyanatı onların çarəsizliyinin və müharibədəki məğlubiyyətinin nəticəsi olan xəyallardan başqa bir şey deyil. SEPAH öz sözünü döyüş meydanında deyir”, – deyə o vurğulayıb.

Mohebbinin sözlərinə görə, Tramp üçün yeganə mümkün yol məğlubiyyəti etiraf etmək və İslam Respublikasının şərtlərini yerinə yetirməkdir. O, həmçinin xəbərdarlıq edib ki, ABŞ rəsmiləri uğursuzluqlarını nə qədər tez etiraf etsələr, ölkələri bir o qədər az zərər çəkər.

Qeyd edək ki, bundan əvvəl D. Tramp ABŞ-nin qeyri-rəsmi kanal vasitəsilə İrandakı SEPAH nümayəndələri ilə birbaşa əlaqə saxladığını iddia etmişdi.